Грамадзкая кампанія "Рок-салідарнасць" запрашае: 23 мая, серада,
на управе БНФ, па адрасу Мінск, Чарнышэўскага, 3 (недалёка ад метро
Акадэмія навук) пройдзе творчая сустрэча са Зьмітром Вайцюшкевічам. У
праграме – акустычны канцэрт, адказы на пытанні, конкурсы, дыскусія на
актуальныя праблемы беларускай рок-музыкі.і шмат іншага і цікавага!
Уваход вольны! Пачатак 19.00

Зьміцер Вайцюшкевіч – вядомы беларускі музыкант.
Былы удзельнік гуртоў: ПАЛАЦ і КРЫВІ.
Удзельнік знакавых фестываляў: Be Free (Будзь свабодным!), Басовішча,
Рок-каранацыя, Рок па-вакацыях і інш.
За актыўную грамадзянскую пазіцыю гурт разам з іншымі гуртамі трапіў у
так званыя «чорныя спісы».
За апошнія месяцы былі адмененыя ўсе запланаваныя канцэрты гурта.


"Рок-салідарнасць" — грамадская кампанія ў падтрымку рок-музыкантаў,
якія трапілі ў чорны спіс, створана актывістамі грамадскіх арганізацый
і аматарамі айчыннай рок-музыкі, пачалася 10 снежня 2011 года, у Дзень
абароны правоў чалавека.

Стартаваўшы ў Мінску, на сёння кампанія закранула амаль усе гарады
Беларусі, актывісты кампаніі раздаюцб дыскі з музыкай забароненых
гуртоў, праводзяць сустрэчы з музыкамі і інш.
Далучайцеся да кампаніі праз емэйл:  rok.salidarnasc@gmail.com

Дзіўна назіраць за лябірынтамі часу, але заплянаваны на 31 травеня канцэрт гурта «Znich» у клюбе «Re:Public» нават мне нагадаў толькі ўлюбёны выраз майго бацькі: «Дзе мае 17 год?» А якраз крыху больш, гадоў 18 таму да мяне, маладога журналіста адной з моладзевых ґазэтаў, завітаў гэткі няўрымсьлівы стыльны юнак-нефармал і заявіў: «Мне падабаецца ваш "Нотны аркуш", мы з сябрамі з захапленьнем яго чытаем, і вось вырашылі стварыць беларускамоўны рок-гурт». Я выявіў захапленьне слушным пачынам, бо на роднай мове гуртоў тады было нібы пальцаў на руцэ. Але хлопец усё тоіў у сабе нейкую перасьцярогу. І вось насамрэч гаворыць: «Але мы мэтал вырашылі граць…» Зразумеўшы трывогу творчай асобы ў краіне, дзе сама рок-музыка яшчэ надоечы была пад забаронай, а пра новую пошасць heavy-metal і гаварыць забаранялася, я пасьпяшаўся засьведчыць, што сам не прыймаю забаронаў у творчасьці: «Цудоўна! А хто тэксты ў вас піша?» Адказ зьбянтэжыў нават мяне: «Ніхто, мы плянуем базаваць нашу творчасць на фальклёры». І я ўздрыгануўся, бо за савецкім часам нам навязваўся фальклёр у выглядзе калгасных папевак перастаркаў кшталту «Мяне мілы разьлюбіў, я сяджу і плакаю…», што ніяк не вязалася з экстрымам, ґроўлінґам і скрымінґам. Але толькі папярэдзіў: «Абы не атрымалася безґустоўшчыны».

Воляю лёсу я адышоў ад музычнай журналістыкі, стаўшы намесьнікам рэдактара кінаґазэты, але вобраз гэтага нібыта дзіўнаватага хлопца ня зьнік у сьвядомасьці, бо неўзабаве ён перавярнуў сваёй нестандартнасьцю ўвесь музычны сьвет, калі набраў моц ягоны праект «Znich» і я пачуў і запомніў імя – Алесь Таболіч. Ён апынуўся на піку вяршыні менавіта таму, што рабіў нешта неверагоднае, рабіў якасна, ніколі не прагінаўся пад ціскам сітуацыяў, а сам зьмяняў пэўныя ўстоі. Ён і мне зьмяніў погляд на фальклёр, дазволіўшы ўбачыць сакральную энэрґетыку неўміручых песень нашых продкаў.

Склад гурта «Znich» неаднаразова зьмяняўся, але непаўторны шарм культавага экстрым-бэнда заставаўся. У працы над сваім апошнім альбомам «Мроя» яны былі максімальма набліжанымі да першаснага складу, дадаліся новыя асобы й абставіны, таленавіты сын бацькоў сваіх стаў любімым мужам. І я адчуваю: яму не давядзецца шкадаваць пра свае 17 год, бо плён іх у пяці паўнавартасных альбомах, у трывалай беларускай сям’і. Новы канцэрт выявіць і яшчэ больш новы плён, бо разам з жонкай і аднадумцамі ствараюцца новыя песьні. І ня толькі…

Вітаўт МАРТЫНЕНКА,

музычны крытык.

31 мая ў клубе Re:public (Прытыцкага. 62) лідэры беларускай
метал-фольк сцэны гурт ZNICH з вялікім сольным канцэртам “Лепшае за 16
год і эксклюзіўныя песьні” Кошт квіткоў: 55 000 - першыя 100, 65 000 - 75 000 – папярэдне, танцпол. 85 000 - месца за столікам плюс кампакт-дыск ZNICH у
падарунак! Пачатак 19:00. Кропкі продажу квіткоў: пераход Коласа, Гум, re:public, ГЦ Купалаўскі. 19 кропка, ГЦ Рыга, 18 кропка і інш. Даведкі: 029-6490888

IV міжнародны фэстиваль сярэднявечнай культуры й музыкі "Наш Ґрунвальд", прысьвечаны 602-й гадавіне вялікай Ґрунвальдзкай бітвы, адбудзецца 20-22 чэрвеня 2012 года на тэрыторыі Музэйнага комплексу "Дудуткі" (Менская вобласць, Пухавіцкі раён, в. Пціч)!У праґраме фэстывалю:

• конны й пешы рыцарскія турніры
• бугурты (масавыя змаганьні рыцараў)
• турнір лучнікаў
• рэканструкцыя  бою «Ґрунвальдзкая бітва»
• горад майстроў
• гандлёвыя шэрагі
• конкурс вогневага шоў

• выступы танцавальных і тэатральных калектываў
• рок і фольк канцэрты

• сярэднявечныя атракцыёны й забавы на ўсялякі ґуст для гасьцей і гледачоў фэстывалю!

Значэньне Ґрунвальдзкай бітвы ў гісторыі Беларусі, Польшчы, дый усёй Эўропы надзвычай важнае. У выніку адной з самых маштабных бітваў сярэднявечнага сьвету зьмянілася расстаноўка сіл на сусьветнай арэне, ВКЛ і Каралеўства Польскае выйшлі на першыя пазыцыі ў рэґіёне…
15 ліпеня 1410 г. аб'яднаныя сілы Вялікага княства Літоўскага й Каралеўства польскага разграмілі сілы Тэўтонскага ордэна ды паклалі тым самым канец больш чым двухсотгадовай вайне,  спынілі нямецкую аґрэсію на шмат стагодзьдзяў наперад.
Перамога ў Ґрунвальдзкай бітве – адна з самых слаўных старонак у беларускай вайсковай гісторыі, годная паўнавартаснага сьвяткаваньня на беларускай зямлі!
Фэстываль прысьвечаны як вайсковай, гэтак і сьвецкай сярэднявечнай культуры нашых продкаў і закліканы фармаваць ды ўмацоўваць павагу да слаўнай гісторыі нашай зямлі!

Сьвяткаваньне гадавіны перамогі пад Ґрунвальдам, галоўным мерапрыемствам якога ў Беларусі апошнія чатыры гады, несумненна, зьяўляецца правядзеньне фэсту «Наш Ґрунвальд», ставіць мэтай прыцягненьне ўвагі шырокіх слаёў грамадзкасьці да неапраўдана забытых леґендарных старонак гісторыі нашай краіны!
Цэнтральнай падзеяй фэстывалю стане рэканструкцыя бітвы, якая адбылася 15 ліпеня 1410 г. на полі ля мястэчка Ґрунвальд паміж войскамі Тэўтонскага Ордэна й войскамі хаўрусьнікаў: Вялікага Княства Літоўскага й Каралеўства Польскага. У рэканструкцыі бітвы возьмуць удзел прадстаўнікі клюбаў вайскова-гістарычнай рэканструкцыі зь Беларусі, Расеі, Украіны.

У межах трохдзённага фэсту на тэрыторыі музэйнага комплексу "Дудуткі" будзе дзейнічаць рыцарскі ляґер, намётавы ляґер для гледачоў. На працягу ўсяго фэстывалю гледачоў і ўдзельнікаў чакае насычаная праґрама, у межах якой пройдуць рыцарскія турніры, масавыя рыцарскія бітвы, турнір лучнікаў, рок і фольк канцэрты, процьма іншых імпрэзаў.
Усе госьці фэстывалю «Наш Ґрунвальд» змогуць самі стаць удзельнікамі розных рыцарскіх спаборніцтваў: навучыцца стральбе з лука ці арбалета, наведаць майстар-клясу гістарычнага фехтаваньня, паўдзельнічаць у шатляндзкіх ігрышчах, прымерыць рыцарскі рыштунак!
Мейсца правядзеньня фэстывалю:
Музэй старадаўніх народных рамёстваў і тэхналёґіяў "Дудуткі" (Менская вобл., Пухавіцкі р-н, в. Пціч)
GPS каардынаты: 53 ° 35.796 \ 'N 27 ° 41.061 \' E
Сайт музэю: www.dudutki.by

арґанізатары фэстывалю: Экстрым Тэатр "Berserk" http://vk.com/berserk_theatre

музэйны комплекс "Дудуткі" www.dudutki.by

больш падрабязна пра фэст: http://vk.com/nash_grunwald

«Hard Life – Heavy Music» многія называюць найбольш пасьпяховым музычна-выдавецкім праектам у Беларусі (рэґулярны выпуск альбомаў, маштабныя канцэрты ў розных гарадах краіны). Як і ўсялякая пасьпяховая ініцыятыва, ён мае й ляґічныя першакрыніцы, і стыхійныя ўплывы.

Прад’юсарская ініцыятыва «БМАgroup», узьнікшая зь сярэдзіны 90-х пад дахам Таварыства Беларускай Мовы, пачынала сьпярша з касэт і поп-складанак на роднай мове, а займацца элітарнымі відамі мастацтва пабойвалася, каб не загнаць саму мову ў тупік (хай сабе й элітны). І ўсё ж адмыслоўцы прыкмецілі, што стылістычна акрэсьленыя альбомы карыстаюцца ў нас значна большым попытам, чым маскультаўскі нос па ветру. Каб спраўдзіць адкрыцьцё, была задумана сэрыя складанак пад умоўнай назвай «Энцыкляпэдыя Рок-стыляў». Пільна падрыхтаваныя CD-кампіляцыі «Hard Life – Heavy Music», «Hardcoreманія: чаду!», «Пасадзіў Dead Rapку/Rap Not Dead» выклікалі такі шалёны попыт, што «БМАgroup» забыў на ўсе свае «надзеі і апоры» кшталту «Вольных танцаў», сьвяточных складанак, а заняўся найпасьпяховейшым з пасьпяховых – «Hard Life – Heavy Music».

З 2001 да 2006 год выйшла чатыры складанкі гэтай сэрыі, многія зь іх сталі музычнымі рарытэтамі. Пад уплывам «Hard Life – Heavy Music» да паўнафарматных мэтал-рэлізаў менавіта на роднай мове дасьпелі ня толькі клясыкі жанру («Znich», «Imprudence», «Apraxia»), але й колісь прынцыпова анґламоўныя апаляґеты плыні («DeadMarsh», «Partyzone», «Dialectic Soul»). Фраґмэнтарна паўдзельнічаць у праекце лічылі за гонар многія прызнаныя ў гэтай сфэры адмыслоўцы (нашы «Vicious Crusade», «Gods Tower», «Straight Land» і замежныя – галяндзкі «Third Stone», польскі «The Dvery», расейская «Arizona»). Вырасла ў Беларусі й цэлая плеяда маладых ґеніяў цяжкой ґітары («ZM99», «Soulsides», «Kamajedzica»). І ўсё ж у пэўны момант нехта падказаў «БМАgroup» мяняць коней на пераправе. Абнаўленьні нікому не заміналі, бо паляпшалася якасць запісаў, майстэрства музыкаў, узмацнялася канкурэнцыя сярод удзельнікаў, што дазваляла выбіраць лепшае зь лепшых, але… Нават сам праект перайменавалі ў «Metallection». І пры ўсіх сваіх вартасьцях, ён пачаў затухаць.

Як заўжды на пасьпяховай ніве над сьвежым трупам пачыналі кучкавацца шакалы й марадзёры, прапануючы пад яшчэ гарачанькім брэндам свае «аналяґічныя шоў», якія толькі марнавалі аўтарытэт удалай ініцыятывы. І вось з гэтай прычыны лэйбл «БМАgroup» сам вырашыў заняцца адраджэньнем свайго несьмяротнага гадаванца, прызначыўшы на мэтафарычны дзень пятніца, 13 красавіка маштабнае шоў «Hard Life – Heavy Music». І гэта ня ліпа, а той «Hard Life – Heavy Music», якім ён быў заўсёды: яркім, заманлівым, шматабяцальным. Падабралі для гэтага й адпаведную пляцоўку – найбольш прэстыжны й вядомы музычны клюб «Re:Public» (ля ст. м. «Кунцаўшчына»). На афішы зьзяюць добра знаёмыя з мінулых кружэлак сэрыі і паводле ўласных пасьпяховых альбомаў імёны «Imprudence», «Straight Land», «Soulsides», дачакаецца публіка й вялікай сцэны для тых, пра каго пагалоска апярэдзіла ўвагу сур’ёзных прад’юсараў. Як, напрыклад, прышпільныя сталічныя ґрайндкоршчыкі  «Exegutor» (рыхтуйце грошы на іх фірменны альбом). А мяне асабіста заінтрыґаваў праект «Symphony Of Seven», нагадаўшы куміраў маладосьці «In Spe» з Эстоніі, бо ў іх быў арт-рокавы альбом з назвай «Сымфонія для сямі выканаўцаў» (дзе той Эркі Свэн Цюйр цяпер?).

Многае нагадае імпрэза, якая пачнецца 13 красавіка ў 17.30. Рана пачнем – шмат пасьпеем. Хто рана прыйдзе, таму сам бог дае.

Кошты квіткоў не назавеш дарагімі: першыя 100 жадаючых заплоцяць усяго 45 000 (як пара разоў памыцца ў лазьні), астатнія папярэднікі – 55-65 000, а месца за столікам + кампакт дыск у падарунак  – за 75 000. Дый усім папярэднім замоўцам абяцаюць CD ў падарунак. Каму «Hard Life – Heavy Music», а каму й што пашанцуе.

Кропкі распаўсюду квіткоў: пераход на пл. Я.Коласа, пераход ля ГУМа, у ГЦ «Riga» (18 кропка), ГЦ «Купалаўскі» (19 кропка), у самім клюбе «Re:Public» ды інш.

Даведкі праз тэл. 649 08 88.

Вітаўт МАРТЫНЕНКА.

Яго мэта – падбадзёрыць забароненых беларускіх рок-музыкаў і засароміць чыноўнікаў, якія ва ўпор не бачаць “чорных спісаў” пад сукном сваіх працоўных сталоў.

 Легендарныя “чорныя спісы” забароненых у Беларусі рок-музыкаў да такой ступені надакучылі фэнам, што яны пачынаюць смяяцца з праблемы.

 “Музыкі з чорнага спісу пастаўленыя ва ўмовы паўпартызанскага існавання. Ні канцэртаў, ні сустрэч з фэнамі. Да таго ж – поўны ігнор з боку чыноўнікаў, - расказвае адзін з актывістаў кампаніі Вітаўт Пазьнякевіч – Тут адно што выць, а не пець застаецца”.

 Але ў беларускай гісторыі былі моманты, калі толькі творчасць дазваляла людзям выжыць і не страціць веру ў перамогу, кажа Вітаўт: “Узгадайце гумарыстычную газету-плакат “Раздавім фашысцкую гадзіну!”, якую рэдагаваў Кандрат Крапіва. Вось мы і падумалі: па старой партызанскай традыцыі, варта даць кухталёў вузкалобасці і абмежаванасці некаторых адказных таварышаў. І нагадаць нашым рок-музыкам: усміхніцеся – мы з вамі!”

 Творчы конкурс у падтрымку забароненых музыкаў і супраць “чорнаспіснага” самаўпраўства называецца “White strikes”. “Вы што!!! Мы ні ў якім выпадку не мелі на ўвазе якія-небудзь страйкі. Толькі творчасць. Мы за мір і гумар! А наконт сугучнасці назваў конкурса і вядомай групы “White stripes”… Спадзяюся, Мэггі і Джэку Уайтам пасля нашай ініцыятывы ўсё ж выдадуць беларускую візу”.

 Аўтары конкурса падкрэсліваюць: галоўнае ў працах – ніякага негатыву, слёз са стогнамі і абразаў людзей. Толькі ядроны гумар, выпальваючы сарказм і бранябойны крэатыў: “Мы за рок-зорак і супраць культурнага цемрашальства. Рок, салідарнасць, вясна, каханне – гэта тое, што ніхто не можа забараніць!”.

 Удзельнічаць у конкурсе можа кожны – узрост не абмежаваны. Прымаюцца любыя творчыя працы: малюнкі, плакаты, банеры, сайты, мультымедыйныя прэзентацыі, відэаролікі, фотасэсіі, вершы, апавяданні, эсэ, калажы, музычныя кампазіцыі – усё, што падкажа фантазія.

 Дасланыя працы будуць апублікаваныя на сайце www.belmusic.org, а таксама перададзеныя музыкам. Лепшыя працы стануць асновай спецыяльнага кампакт-дыску «Рок і салідарнасць».

 Усе аўтары добрых працаў атрымаюць прызы: абанементы на розныя рок-канцэрты, кампакт-дыскі і кнігі з аўтографамі спісавых музыкантаў. А гранд-пераможца атрымае самы галоўны прыз: яго праца будзе растыражаваныя на значках, вокладках дыскаў, майках, сумках і іншых носьбітах. Таксама удзельнікаў чакае вечарына ў кампаніі сваіх любімых музыкаў!

 Дасылаць працы на e-mail: rok.salidarnasc@gmail.com з пазнакай “White strikes”. Па гэтым жа адрасе можна атрымаць усе кантакты і даведкі. Працу можна пазначаць нікнэймам.

 Даведка:

Рок-салідарнасць – грамадская кампанія ў падтрымку рок-музыкаў, якія трапілі ў “чорны спіс. Кампанія, створаная актывістамі грамадскіх арганізацый і аматарамі айчыннай рок-музыкі, распачалася 10 снежня 2011 году, у Дзень абароны правоў чалавека. Стартаваўшы у Мінску, на сёння кампанія закранула Магілёў, Наваполацк, Віцебск і іншыя гарады краіны. Актывісты кампаніі працягваюць інфармаваць насельніцтва пра так званыя “чорныя спісы” і пра забароны канцэртаў. 

Старонкі кампаніі ў сацыяльных сетках:

http://vkontakte.ru/club31472006
http://www.facebook.com/groups/159259177503512/

Беларускі post-metal-гурт «Re1ikt», альбом «Рэкі прабілі лёд» якога лэйбл «БМАgroup» выдаў у 2011 годзе, рыхтуецца да выхаду другога live-DVD. Здымкі праходзілі на канцэрце-прэзэнтацыі згаданага альбома ў менскім клюбе «Re:Public» 30 кастрычніка 2011 года (гл. адпаведныя тэксты аўтараў нашага сайту ў рубрыках «Навіны» і «Рэцэнзыі»).

Паводле заяваў саміх музыкаў, гэтым DVD яны хочуць скончыць стары пэрыяд гурта «Re1ikt» і пачаць новы, бо той канцэрт быў апошнім выступам з былым вакалістам каманды. Цяпер калектыў рыхтуе новы матэрыял і працуе, адпаведна, з новым фронтмэнам, які хутка будзе прадстаўлены слухачам. Рэліз атрымаў працоўную назву «Крыгаход» («Kryhachod»).

«Re1ikt» – першапраходцы беларускамоўнага post-metal. Дый сама кружэлка «Рэкі Прабілі Лёд» стала першым афіцыйна выдадзеным альбомам у гэтым стылі, цалкам выкананым на беларускай мове. Ён выйшаў і на партнёрскім з «БМАgroup» лэйбле «Vigma» толькі летась у кастрычніку, а пасьпеў, аднак, заняць 13-е мейсца па колькасьці прададзеных экзэмпляраў сярод беларускіх музычных рэлізаў «Вігмы» за 2011 год.

У сваёй музыцы «Re1ikt» таксама спалучаюць такія накірункі, як progressive rock, post rock, art rock, alternative rock.

Прапануем паглядзець трэйлер да новага DVD «Re1ikt».

http://www.youtube.com/watch?v=xpYbKLkRwds

http://re1ikt.com/

http://innerberlin.com/

Вітаўт МАРТЫНЕНКА.

Гэтага канцэрту вельмі многія даўно чакалі, бо адна з самых слухабэльных рок-каманд Беларусі без аніякіх «чорных сьпісаў» надта рэдка сустракаецца на афішах. І вось калі ласка: 15 сакавіка 2012 году рок-клюб «Йо-Ма-Йо», які працуе ў Палацы Культуры МТЗ, запрашае на акустычны канцэрт гэтых унікальных артыстаў, аўтараў шасьці разнастайных па мэлядызму й паэтычным напаўненьні альбомаў.

Імя лідэра гурту «P.L.A.N.» Андрэя Плясанава памятаюць яшчэ беларускія бітнікі рубяжа 1960/70-х гадоў, калі ён быў сярод арґанізатараў і ўдзельнікаў першых біт-фэстываляў у Менску (ён апярэдзіў нават Woodstock).
Напрыканцы ХХ стагодзьдзя Плясанаў стварыў гурт, які гэтак і вырашана было назваць «P.L.A.N.» (што азначае PLясанаў ANдрэй).

Застаючыся прыхільнікам клясычнага рытм-энд-блюзу, Андрэй Плясанаў мае й іншы матэрыял: нямала ўласных апрацовак фальклёру, былі нават экспэрымэнты з рэпам, нямала цікавых уласных кавэр-вэрсыяў сусьветных гітоў. А прынцыповая й сьмелая грамадзянская пазыцыя Андрэя Плясанава дазволіла яму стаць адным з галоўных гэрояў новай кнігі Вітаўта Мартыненкі «Rock on-line» (у Андрэя й нямала песень на вершы Вітаўта).

15 сакавіка Палац Культуры МТЗ ў 19 00 запрашае на жывую сустрэчу з рок-леґендай Беларусі.

Адрэса: вул. Даўгаброская 24-31 (рок-клюб «Йо-Ма-Йо»).

Кошт: 25 000 папярэдне, 30 000 у дзень канцэрта.

Месца продажу квіткоў: +375 29 571 68 19 (Ганна); альбо ў дзень канцэрта ў клюбе.

Інфалінія: +375 29 571 68 19.

Кастусь БАЕШКА

Як паведамляе польская ґазэта «Kurier Poranny» (28.02.2012), беларускі актор, паэта й бард, артыст Гарадзенскага абласнога тэатра лялек, пераможца фэстывалю «Бардаўская восень» у Бельску Падляскім і «БАСовішча» ў Гарадку, кавалер польскага Ордэна Ўсьмешкі Віктар Шалкевіч будзе адным з выканаўцаў галоўнай ролі ў м’юзыкле «Korczak», прысьвечаным жыцьцю выдатнага польскага казачніка Януша Корчака (на беларускую мову перакладаліся ягоныя гісторыі пра Караля Мацюся).

Дык вось якую навіну аб нейкім творчым посьпеху затоіў Віктар Шалкевіч на нядаўняй аншляґавай прэзэнтацыі свайго апошняга альбому «Шчасьлівая сямёрка» ў сталічным Палацы культуры БелТГ! А пытаньні ж былі настойлівыя зь перапоўненай залі. Аказваецца, яшчэ з кастрычніка 2011 году ў Польшчы распачаліся пільныя кастынґі, а канкурэнцыя была такая, што загадзя казаць аб выніках уяўлялася небясьпечным.

М’юзыкл «Korczak», цьвердзіць ґазэта «Kurier Poranny», першая падобная ініцыятыва Opery i Filharmonii Podlaskiej, таму тэатральныя адмыслоўцы надзвычай сур’ёзна паставіліся да пошуку маладых выканаўцаў жаночых і мужчынскіх роляў. Кандыдаты мусілі паказаць журы дзьве песьні на польскай і анґельскай мовах. Калі з Шалкевічам ужо вырашана, дык кастынґі на астатнія ролі будуць працягвацца яшчэ й у сакавіку (ажно да 14 сакавіка дзейнічае адрас прыёму заявак ад творчых асобаў musical.korczak@oifp.eu ). Узрост шуканых талентаў вызначаны ад 20 да 40 гадоў. Агулам у м’юзыкле пра Януша Корчака – лекара, пэдаґоґа і дзіцячага пісьменьніка, які разам з групай сваіх выхаванцаў загінуў у канцляґеры Трэблінка,  плянуецца два склады актораў, дзе будзе задзейнічана 40 асобаў.

Прэм’ера м’юзыкла «Korczak» рэжысэр Робэрт Скальмоўскі плянуе на пляцоўцы варшаўскага Палаца культуры ўжо гэтым летам, 22 ліпеня. А 29 верасьня (сьвяты Дзень Вітаўта), падчас чарговай інаўґурацыі новай опэры, «Korczak» убачаць аматары тэатральна-музычнага мастацтва й Беластоку. Гэта пакуль толькі першыя пляны аўтараў задумы.

Вiтаўт МАРТЫНЕНКА.

24-га лютага у клубе RE: PUBLIC адэпты зульфійскай секты, апошнія менестрэлі меладраматычнага пост- року, гурт Разбітае Сэрца Пацана прэзентуе свой першы максі- сінгл з сакраментальнай назвай Ч/Б, які умоўна будзе падзяляцца на дзве часткі ; чорную і белую. У першую частку увойдуць чатыры новыя песні і тры будуць на другой. Гэтай працай музыкі хацелі закрануць тэму дуалістычнасці сьвету, каб даведацца ці удалося ім гэта, прыходзь на вялікі канцэрт-прэзентацыю у RE : PUBLIC. Неўтаймаваная энергія і драйв, шоў-падтрымка экцэнтрычнага дэнс-шапіто ЭВМ, відэа інсталяцыі, сюрпрызы і катарсіс гарантуюцца!

Кошт квіткоў:
40 000 - першыя 100
45 000 - астатнія, папярэдне
50 000 - у дзень канцэрта, танцпол
65 000 - месца за столікам + кампакт-дыск у падарунак!

Даведкі: 6490888
Кропкі продажу квіткоў: пераход Я.Коласа, пераход Гум, ГЦ Купалаўскі. 19 кропка, ГЦ Рыга, 18 кропка, клуб Re:public і інш.

Рэклямны ролік «Pananieba» глядзець усім
Ведаеце Вітаўта Мартыненку? Ціпа журналіст, рок-паэт і амаль рэпер (гіт «Diss ад Please»)… Але рыхтуючы прэзэнтацыю новага альбому «71» рэп-гурта «Pananieba» (23 лютага 2012 ў клюбе  «Re:Public») мы выявілі, што ў межах BellyWooda ён стварыў бы канкурэнцыю самому Арні Шварцэнэґеру.
Не, магутнай кінаіндустрыі ў Беларусі пакуль няма, дый Вітаўт акадэміяў кінамастацтва не праходзіў, але шэдэўрыкі кліпмэйкерства пакрысе назапашваюцца, што паказаў і эфэктны трохгадзінны DVD «Кліп-Марафон» (2008).
Дзесяцігодзьдзямі займаючыся нацыянальным рок-мастацтвам, В.М. ня раз трапляў у кадр сур’ёзных кліпаў вядомых гуртоў (бондаўскі «Ура!», рэеўскі «Храмы падаюць»), але ўсё гэта былі банальныя тэхнічныя праходкі ледзь не ў масоўцы. А вось кліпмэйкеры студыі «КапканFilm»  Андрэй Адамовіч (ідэя і сцэнар) ды Аляксандр Крупіна (рэжысэр і апэратар) вырашылі аддаць Вітаўту практычна галоўную ролю зацятага змагара з рэпам у сваім творы. Вось што распавядае «supernova» экрана:
– Ніколі не вазьмуся за драматычную ролю, хоць у школьных спэктаклях даводзілася сьмяшыць публіку. Але кліп… Ды ня кліп нават, а рэклямны ролік на 12 сэкунд, паказаў мне надзвычайную ёмістасць працы РЭЖЫСЭРА КЛІПАЎ, які можа стварыць цуд аж ці не зь бервяна. Над гэтымі 12-цю сэкундамі мы працавалі некалькі гадзін, ды яшчэ безь мяне колькі, затое мне ўдалося насьмяшыць нават самога сябе, бо ў хлопцаў быў прадуманы кожны кадр. Праўда, нейкім выпадковым жэстам у кадры я нават апэратара зьдзівіў, чым ганаруся.
Здымкі кліпа адбываліся ў шчасьлівы дзень 7 лютага на адной з кватэраў менскіх ускраін, дзе рэжысэр і сцэнарыст дакладна ведалі, чаго хацелі. Кожны кадр яны імпэтна ляпілі з таго, што склалася ў іхніх галовах, а матэрыялам былі ня толькі разьюшаны Мартыненка, але й эфэктнае відэа гурта «Pananieba» з ранейшых клюбных аншляґаў, таму пасьля апэратыўнага мантажа ролік ужо 8 лютага стаў зоркай пракату сьпярша на «YouTube» http://www.youtube.com/watch?v=lvg9wHdoKZQ , а потым і ў сацыяльных сетках http://vk.com/event34184708
Кастусь БАЕШКА.

Дуда (валынка) – адзін з найбольш архаічных музычных інструментаў, пашыраны на аграмадных абшарах ад Ішпаніі да Індыі. Кожная краіна мае свой тып дудаў, якія адрозніваюцца як канструкцыяй і спецыфічным тэмбрам. На тэрыторыі Беларусі дуда вядомая з глыбокай старажытнасці. Дуда справядліва магла б стаць сімвалам нашай краіны, накшталт дуды (bagpipe) у Шатландыі, настолькі яна была вядомая і блізкая кожнаму беларусу.
Дуда – духавы язычковы інструмент, які згадваецца ў старабеларускай літаратуры ўжо з XV стагоддзя. Выраб яе лічыўся справай сакральнай. У XIX стагоддзі дуда стала адным з самых папулярных беларускіх інструментаў. Тып “беларускай” дуды быў пашыраны не толькі на тэрыторыі ўласна Беларусі, але і ў Літве і Латвіі.

TESTAMENTUM TERRAE (з лацінскай мовы “Запавет зямлі”) – беларускі гурт сярэднявечнай музыкі, створаны ў 2003 г., першапачаткова меў назву “TESTAMENT”, стваральнік і кіраўнік – Юрась Панкевіч. Гурт удзельнічае ў фестывалях сярэднявечнай культуры (“Лідскі Замак”, “Русборг”, “Рубеж”, “Магутны Божа”, “Грунвальд”, “Старадаўні Львоў”), фестывалях сярэднявечнай музыкі і музычных конкурсах (“Легенды восені”, конкурс выканаўцаў сярэднявечнай музыкі “У гонар каралевы Боны”), а таксама арганізуе ўласныя танцавальныя вечарыны. Гурт TESTAMENTUM TERRAE выкарыстоўвае копіі інструментаў XV- XVІІІ стст.: беларускія дуды, лютню, шалмеі, жалейкі, скрыпку, бубны, барабаны і інш.
Першы альбом – “Слаўны паніч” – прэзентуе гістарычную музыку часоў Вялікага Княства Літоўскага: мелодыі беларускіх танцаў і абрадаў, балады і рэкрутскія песні (са збораў М. Федароўскага), папулярныя мелодыі еўрапейскага сярэднявечча, а таксама некалькі аўтарскіх стылізацый.

СТАРЫ ОЛЬСА – гурт сярэднявечнай беларускай музыкі, створаны ў 1999 г., стваральнік і кіраўнік – Зміцер Сасноўскі. Склад – 6 чал. Першы склад гурта быў створаны з гомельскіх музыкаў. Назва – ад ручая ў заходняй Магілёўшчыне. У рэпертуары – беларускія народныя балады і ваярскія песні, творы беларускіх кампазітараў эпохі Рэнесанса, кампазіцыі з беларускіх зборнікаў прыдворнай музыкі (“Полацкі сшытак”, “Віленскі сшытак”, “Брэсцкі канцыянал”), беларускія канты XVІ – XVІІ стагоддзяў, а таксама еўрапейскія папулярныя мелодыі эпохі Сярэднявечча і Рэнесанса.
Музыка гурта выконваецца на максімальна магчымых копіях старадаўніх беларускіх інструментаў – дуды (валынкі), ліры, гуслі, свірэлі, сурмы, лютні, цыстры, шалмеі, рэбеку і інш. Мэта – найбольш поўная (па-магчымасці) рэканструкцыя музычных традыцый Вялікага княства Літоўскага, асноўнай культурнай і геапалітычнай часткай якога ў ХІІІ – XVІІІ стагоддзях была Беларусь. Запісаны 6 студыйных альбомаў, 2 канцэртныя і 1 музычны праект. Музыка гурта ўвайшла ў 8 разнастайных зборнікаў. Апошні альбом пад назвай “Дрыгула” (назва танца) запісаны ў 2008-2009 гадах і прысвечаны вядомаму зборніку барочнай музыкі “Полацкі сшытак”.

Праграма Тыдня дударскай музыкі:

26 студзеня. Мінск. Малы зал к/з Мінск. Канцэрт ЛЕГЕНДЫ ВЯЛІКАГА КНЯСТВА - СТАРАЖЫТНАЯ ЗЯМЛЯ. Свята дуды з гуртамі: Testamentum Terrae, Brevis, Cornucopia, . Irdorath folk band, сярэднявечны Вулічны Тэатр  “Шальмоўскі Тэатр Ды Грыза, Гурт гістарычнага танца “Фламея”, Бурносенка Аляксей, Школа гістарычнага танца “Залаты двор”. У праграме таксама рыцарскія баі ад "Мінскай Уніі "Меч і Воран" і інш. Пачатак 19.00.

Квіткі: 30 000, 40 000, 50 000. Даведкі: 6490888, 017-3286638

27 студзеня. Брэст. ГКЦ. Свята дуды з гуртамі СТАРЫ ОЛЬСА і TESTAMENTUM TERRAE. Даведкі: 029-3139860. Квіткі 30 000.

28 студзеня. Гомель. Свята дуды з гуртамі СТАРЫ ОЛЬСА і TESTAMENTUM TERRAE. ГЦК. Даведкі: 029-6720352. Квіткі ад 25 000 да 45 000.

2 сакавіка канцэрт гурта СТАРЫ ОЛЬСА у Мінску у Палацы культуры Прафсаюзаў з праграмай «Гераічны эпас і Полацкі сшытак». Квіткі ад 50 000 да 70 000. Даведкі: 6490888

Каляды, бадай, самае ўлюбёнае сьвята для ўсіх людзей зямлі. Калі нехта можа не заўважыць, напрыклад, Дзень Радыё ці нават чыйсьці дзень нараджэньня, дык забыць пра Каляды проста немагчыма: людзі зьбіраюцца разам, танчаць, гуляюць у калядныя гульні, сьпяваюць (ці проста слухаюць) калядныя песьні.

Беларусам на Каляды пашанцавала нават двойчы, бо наша поліканфэсыйнасць прывяла да таго, што сьвята Божага нараджэньня сьвяткуецца і паводле старога календара, і паводле новага. І вось 7 студзеня менскі Палац Вэтэранаў запрашае на неверагодны акустычны калядны канцэрт, які да ўсяго іншага будзе й прэзэнтацыяй унікальнага фанаґрафічнага выданьня – CD Данчык «Калядныя песьні». Унікальнага таму, што раней (гадоў 15 таму) выходзілі толькі касэты з такой праґрамай, а цяпер сучасныя тэхналёґіі дазволілі падрыхтаваць адпаведны часу прадукт, які зьмясьціў ня толькі два дзясяткі песенных шэдэўраў, але й жывыя відэазапісы знакамітага сьпевака, якога называюць «Залаты беларускі голас з Амэрыкі».

Як вядома, у беларускай традыцыі сымболем гэтага сьвята стала Калядная Зорка (пра яе й многія песьні). Дык вось і на канцэрце гэтым зьбяруцца сапраўдныя зоркі беларускай поп- і рок-музыкі, бардаўскай песьні (Тацяна Беланогая, Зьміцер Бартосік, Андрэй Плясанаў, Андрэй Хадановіч, Эдуард Акулін, Аляксей Галіч), каб ушанаваць песьняй Калядную Зорку.

Калі ў двух словах пра артыстаў, дык пераможцу шэрагу эўрапейскіх фэстываляў акустычнай рок-музыкі Таню Беланогую беларусы ведаюць найперш па альбомах «Дзьвюхкроп’е» і «Ніткі», якія займалі месцы ў гіт-парадах, траплялі на тэлевізію. Бартосік і Хадановіч прывабліваюць найбольш аматараў сьцёбных песенных фэльетонаў, у той час як Плясанаў (а ў яго 6 альбомаў) заслужана атрымаў у прэсе тытул «лепшага пасьля Мулявіна рок-мэлядыста Беларусі».

Некалькі альбомаў выдаў і тонкі лірык, кароль бардаўскага жанру й паэзіі Э.Акулін, а вось унікальнаму таленту Аляксея Галіча удалося пакуль прабіць толькі папулярныя складанкі сярэднявечнай музыкі кшталту «Леґенды Вялікага Княства», «Medieval», хоць дыяпазон ягонага вакальнага таленту заслугоўвае паўнафарматных аўтарскіх альбомаў.

У фае канцэртовае залі можна будзе таксама паглядзець поўную дыскаґрафію ўсіх гэтых артыстаў, а нешта й набыць на памяць аб цудоўным сьвяце. А ўсім дзеткам арґанізатары абяцаюць падарункі ад Сьвятога Мікалая, заўсёднага патрона Калядаў!

Канцэрт адбудзецца, нагадваем, 7 студзеня ў менскім Палацы культуры вэтэранаў (вул. Я.Купалы, 21) у 19.00. Даведкі па тэл. 649 08 88.

Вітаўт МАРТЫНЕНКА.

КАЛЯДНЫ ФЭСТ

Усе рок-зоркі толькі у нас!

СТАРЫ ОЛЬСА
ZNICH
LITVINTROLL

Кошт квіткоў:
45 000 - першыя 100
50 000 - 55 000 - астатнія, папярэдне
70 000 - месца за столікам+кампакт-дыск у падарунак!

Усім у святочных касцюмах - прыемныя падарункі ад арганізатарау!

Даведкі: 6490888

Кропкі продажу: клуб RE: PUBLIC, пераход Я.Коласа, пераход Гум, ГЦ
Купалаўскі, 19 кропка, ГЦ Рыга, 18 кропка і інш.